日本歌姬宇多田光於5年多前宣佈暫停工作，話想試下做個普通人，一抖抖咗5年嘅佢，今年終於復出，首先會為NHK電視台晨早劇《TOTO姊姊》唱主題曲，噚日佢終於都公佈咗個歌名叫做《給你花束》，同時佢亦宣佈進行一個叫做「NewTurn」嘅計劃。

呢個計劃會開設一個網站，如果你去個網站買宇多田光歷來任何一張唱片，就會喺個網站度開一朵花，希望能令個網站版面開滿花。而且呢個亦都係一個慈善計劃，每開一朵花，就會捐出一部份嚟做善事，幫助311地震災民，今日剛剛係311五周年紀念，所以光妹復出亦無忘幫助災民。