孫柏文話個市太過淡靜，又話自己呢輪時常睇錯市，連世界盃戰況都睇錯，要好好思考人生最重要嘅問題，所以又請咗我利世民做一日替工。不過據我所知，其實孫柏文呢幾日係要接待一位從遠方嚟嘅貴賓。唔係賈慶林！孫柏文位客人當然冇賈中常委咁位高權重，佢何德何能接近中央大員！不過響利世民心目中，呢位貴賓嘅專長一定有趣過CEPA，有內涵過區域經濟合作。
賣咗咁耐關子，究竟呢位仁兄係何方神聖？話說美國有一個組織，叫做ActonInstitute，佢哋係一個專門研究宗教同自由市場嘅智庫組織，呢幾日咁啱佢哋嘅始創人RobertSirico神父又到訪香港，而以孫柏文為核心分子嘅獅子山學會，作為本地嘅自由市場智庫組織，當然要盡地主之誼，安排客人同香港領袖會面，講吓宗教同市場嘅關係。相信大家點都估唔到，平日牙擦成性嘅孫柏文竟然會招呼神職人員，唔知佢會唔會又大講「凡人（紙幣）大戰上帝（黃金）」嘅觀點呢？
利世民聽聞獅子山學會響中環仲有個午餐會，有興趣了解下宗教同市場究竟有乜關係嘅朋友，可以聯絡獅子山學會（[email protected]）。

其實，早幾日利世民有幸同FatherSirico共晉午餐，席上大家無所不談，差唔多上至天文下至地產都討論過，不過神父問利世民︰「香港乜都有，點解好似仲有咁多問題？」一時間千言萬語，不知從何說起。
冇錯香港經濟已經好番好多，至少大家已經冇咗當年嗰種惶恐，不過心底始終有好多講唔出嘅憂慮。就以我自己為例，雖然唔憂柴米，但係始終都會擔心香港嘅未來。其他唔講，就以教育為例，明眼人一睇就知道教統局唔掂，但係我哋又可以點？李國章有冇心有冇力去搞教育，盲嘅都睇到，但係我哋又可以點？
人家民主社會，一個咁嘅局長唔單止自己要落台，分分鐘成個內閣都要倒台，就係香港人一啲嘢都做唔到。老實講，學券制就已經可以解決唔少問題，至少家長唔使再為子女入名校搬到豪宅區，唔使再為子女入名校無喇喇受洗扮信主，唔使放榜時擔驚受怕，但係李國章做咗咁Q多年局長，學券制三個字從來都未響佢金口中出現過。都係嗰句，人家民主社會，一個咁嘅局長早就落台。

咁立法會議員又有冇用呢？利世民反問大家一句︰「你哋有冇見過橡皮圖章可以用嚟做攻擊性武器？」對唔往，唔係我有心貶低尊貴議員嘅地位，之不過佢哋亦實在唔生性，吓吓都淨係識話︰「政府有責任做乜乜」或者「政府有責任研究物物」，好似佢哋自己就乜都冇責任，乜都唔識諗，乜都唔使做。如果日後嘅歷史，講到21世紀初香港超級大政府嘅爆發，呢班政客先至係罪魁禍首。不過話說回頭，如果唔係香港有功能組別拖底晒啲水平，又唔係因立法會俾分組點票閹割，又點會有一班咁廢嘅議員？都係嗰句，人家民主社會，呢啲議員早就落台。
利世民記得舊年12．4嘅時候，響街上見到千千萬萬香港人，個心真係好感動，知道香港仲有希望，所以今個星期六，七．一維園見！（大家千祈唔好去錯大球場，嗰班人唔掂㗎！）
利世民