【新增動新聞】

朗尼喺上周五凌晨因為涉嫌醉酒駕駛被拘捕，更爆係朗尼當時揸緊嗰架車有另一個女人，而呢個女人並唔係佢老婆高蓮，而係一位神秘OL，「犯案累累」嘅月巴又衰多次，今次睇嚟有排解畫。呢位OL睇嚟亦唔好惹，事發後接受英國《太陽報》訪問，大爆朗尼衰嘢，由喺酒吧一相識就望實佢個胸，兼唔怕醜問佢個胸有幾大。

朗尼喺周四晚，同前曼聯隊友布朗喺酒吧飲酒狂歡，期間又喺吧枱上跳桌上舞同唱Oasis嘅歌，由下晝開始玩,佢亦喺嗰度認識度Laura。Laura隨後接受英國《太陽報》訪問爆料，佢話：「我喺當晚大約10點去到酒吧，朗尼同佢朋友走嚟自我介紹，之後大家坐低一齊有講有笑。佢似乎對我身裁好有興趣，望到實一實，仲問我對胸size有幾大，仲話：『如果係真嘅我好想摸下喎。』我之後一笑置之，佢似乎畀我搞到暈陀陀，當時我冇話畀佢知我對胸其實係僭建嘅。可以遇上出名嘅足球員，呢啲機會可遇不可求，所以我都好開心可以同佢傾偈。當時我已經飲醉，但我冇做錯到任何嘢，我唔係破壞其他人婚姻嘅人。」

朗尼係喺英國時間當地大約凌晨兩點被捕，喺佢寓所附近揸車被警方截查兼拉埋，之後喺早上已經離開警局。醉駕本身已經大件事，之後仲越揭越臭，被踢爆原來佢當時所揸嘅甲蟲車非唔係佢本人嘅，而係屬於一名29歲OL，據英國《鏡報》嘅報道，呢位神秘女人叫Laura Simpson，職業係房地產經紀，佢點樣識得朗尼，又同佢做過乜就真係冇人知，淨係知佢同朗尼過咗「好瘋狂嘅10粒鐘」，懷疑有人趁老婆身在西班牙同家人度家，又發作偷食。

出事後據講高蓮已經即刻準備飛返英國，睇怕要向朗尼大興問罪之師。

朗尼爛賭爛滾爛飲前科：
http://bit.ly/2wvjlPr