阿叔，你因乜事划住隻入水嘅小艇遊維港呢？話說紅磡碼頭喺星期三下晝5點幾出現咗一位奇怪嘅「划艇叔」，佢划住隻木製小艇喺碼頭對開海面漂浮。睇真啲佢隻艇係溶溶爛爛嘅，仲穿咗窿入緊水㖭。企喺碼頭嘅熱心市民見到咁，即時拋水泡同繩畀佢，將佢救返上碼頭。

熱心市民拋水泡拯救

街坊麥先生當時行經見到碼頭有人解開掛喺石壆旁邊嘅水泡，望向海中心見到呢位划艇叔。麥先生話見到划艇叔好努力咁，想將隻艇划返埋碼頭，但就俾海浪推返轉頭，隻木艇上好多垃圾仲穿咗窿入緊水，情況都幾危急。
就喺呢個時候，碼頭嘅熱心市民將水泡同繩拋畀划艇叔，划艇叔於是伸手用船槳將水泡拉埋自己身邊，最後佢終於返番去碼頭石級邊上岸。划艇叔仲想將隻艇拖埋上岸，但因為隻艇入晒水太重，佢無辦法只有將隻艇用繩綁喺碼頭石躉。
麥先生事後問划艇叔點解喺碼頭對開划艇，但划艇叔只係話佢喺尖沙嘴划到過嚟，其他嘢就唔肯多講。麥先生初時以為划艇叔喺海面執垃圾，但見隻艇爛成咁，就懷疑隻艇係喺颱風過後唔知邊度搵返嚟，總之成件事就好離奇囉。