57歲嘅景黛音無論樣貌同身型都冇走樣，4年前佢活躍微博，不時將自拍相放上網，唔少網民都讚佢保養得宜，封佢為美魔女，但景黛音一聽到「美魔女」呢三個字就驚驚話：「幾時輪到我吖，我真係唔敢擔當，千祈唔好咁講！」

問佢有乜保養心得？景黛音話：「冇，我只係好鍾意飲湯，每日無湯不歡。平時我冇凌晨4點都唔瞓，睇韓國啲片睇到三更半夜。我份人好心急，唔鍾意去美容院成粒鐘做facial，只係間中喺屋企敷吓mask，係呢排要拍嘢，我先至去做吓facial。因為我份人好懶，所以平時又唔做運動，我可以講我係全世界最懶嘅人。」

「我諗，最緊要個心境開朗，唔好樣樣嘢咁緊張，個人放鬆啲，生活唔好困住自己喺個框框度，得閒同啲貓貓狗狗玩吓，個人都開心啲㗎。」

好奇問佢四年前點解忽然愛玩微博？

景黛音話：「因為鄭秀文，我喺度追佢嗰啲嘢睇，我又好欣賞佢，見佢有微博喎，咪跟佢玩吓啦。佢真係好nice，我比較鍾意佢本身人品多啲，佢哋喺圈裏邊成就唔係咁重要，唔係因為佢紅唔紅，唔係因為佢巴閉唔巴閉。」

採訪：戴彩煥
攝影：林德雄
攝錄：葉君海、沈健程
場地：MAGIC3

精選娛聞，喺晒《娛果》
http://fb.com/appledailyent