業績期展開，下周最令散戶矚目的成績表，非滙控（005）莫屬。未知股友有無察覺一個有趣現象，就係近年每逢「大笨象」公佈業績前夕，坊間睇法都係麻麻，尤其對上一次，大家以為次按仲唔玩死滙控？點知事後證實大部份人都睇錯，滙控份成績表比預期好很多。
今次亦有不少人睇衰滙控盤數，所以星俠反而持相反意見。如果過往經驗仍work，港股後市實不應睇得太淡。事實上，大市昨日勁挫逾500點後出現單日轉向走勢，倒升131點，收報22862，成交又增至606億元，反映市場醒目資金似以行動證明睇法，估計後市先上試23300水平。

成交轉活　作勢爆上

中旅（308）昨升4.7%，收報2.21元。現價與08年高位5.85元比較，跌幅達62%！近期中旅跌至2元邊緣後，成交轉活，已升越10日及20日線，短期似已在低位覓得支持，儲力作勢爆上，可反彈重上2.50元水平。中旅旗下珠海海泉灣項目已成功扭虧，加上預期母公司未來仍會伺機向中旅注入資產，以及分拆「芒果網」等均屬正面消息，中旅後市若能企穩2.50元以上，重返3元水平並不出奇。