正如葉家寶話齋，亞視到了最危險的時侯，一日未搵到傳說中的「白武士」，一日都有笑料（我知，就算搵到白武士都仲有排笑）。噚日班管理層就發明「半薪水」方案，簡直可以媲美李小龍「半杯水」哲學。既然今日有半份糧袋住先，聽日又會有啲乜係一半頂住先？　　

1.半天假
我諗ATV員工個個都識唱安仔呢首歌：「放我半天假，若未太清醒，再放半天假……」

2.收視
節目收視得返一半，其實唔係大問題，因為「1」的一半係「0.5」，按照四捨五入，都有「1」點收視，即係維持不變。如果係「0」收視，咪照舊「0」囉。

3.新聞報道
正所謂半斤八兩，你出一半糧，我做返一半都好合理。如果新聞只報一半，其實仲好，到時主播面對「冇稿」情況，大可以講句「新聞報道完畢」，然後去廣告，吖唔係，係《當年今日》先啱。

4.天氣報告
同一道理，新聞報道員報天氣時只報一半：「明日天氣預測，氣溫係（沉默），相對濕度百分之（沉默），火災危險訊號為（沉默）。」

5.六合彩
其實班員工明知冇糧出，都捱義氣幫公司打生打死已經算係咁，所以就算搞破壞，公司都要包容囉。而最大破壞當然係報六合彩只報三個冧把啦！但六合彩之子蔡國威BB咁忠心，應該唔會咁做。

6.節目
亞視金主閂水喉，節目唯有cut一半減省開支。不過其實有幾多人數到亞視仲有乜嘢自家製節目？反正都係冇人理到完場，cut晒啲節目都唔覺。

7.廣告
節目cut一半，咁廣告都可能被迫cut一半。咪住先，乜依家仲有人喺亞視落廣告咩？冇吖嘛，咁咪又可以cut囉！

8.網頁
唔係話ATV網頁內容得一半，係load入去個網嗰條bar永遠load得一半，即係load唔到呀！（其實ATV網頁好多笑料，大家趁仲load到快啲入去！）

9.廁紙
連份糧都可以出得一半，咁以後廁紙都只准用一半啦！話時話，亞視好似邱德根年代已經限定員工如廁只可用兩格廁紙，如果得返一半，咪即係一格？好高難度啫。

10.亞洲小姐
或者大家睇得太多重播嘅亞洲小姐選舉，先至以為停辦N年。查實亞姐年年搞，聽聞係因為有sponsor，焗做。至於大家最想乜嘢得返一半？我估係泳衣（心心眼）。

撰文：杜秋棠＠抽水站
https://www.fb.com/freakingwestlook