蔡瀚億（BabyJohn）今日去到商台宣傳佢擔正嘅電影《救殭清道夫》。BabyJohn話今次訪問會講返童年時喺學校嘅搗蛋趣事，佢話：「以前返學會走堂去唱K，又會整蠱同學，當同學企起身答問題時就用筆篤佢，佢就會擰轉頭用粗口鬧我，跟住佢會畀老師罰，我就好似好無辜咁，幾好玩㗎，o依家都好懷念。」講到童年，BabyJohn就話都有留意最近有多位學童輕生嘅新聞，覺得好震撼，佢話：「我覺得係因為喺學校搵唔到滿足感，讀書壓力大，有競爭，我哋當年學鋼琴係為興趣，o依家已經係必修科，家長應該聽多啲，我個年代係好放手，我鍾意嘅興趣好似做戲咁，排到12點、1點，屋企人都好放心，將來有小朋友，我都會放手畀佢哋搵自己嘅興趣。」問到佢係咪ready做爸爸？BabyJohn就話：「好想㗎，已經諗點樣培養小生命。」

講返主演嘅《救》片，BabyJohn就話好開心可以參加比利時同加拿大電影節，但因為要忙宣傳，未必有時間去當地參加，至於今次拍攝，BabyJohn最難忘係拍一場落水戲時拍到嘔，佢話：「嗰場要hold喺水入面1分鐘，自己有潛水牌，但係狀態唔好潛到嘔，都好慚愧。」