聽日正月十五，既係月圓之夜，亦係今年首個月全蝕嘅出現，天文台話，08年會有兩次日蝕同兩次月蝕，散戶聽到日蝕都冇乜反應，但一聽見話月蝕，好多人都皺眉頭，點解？咪係坊間流傳話每逢月蝕股市都跌，係唔係真？不如等華華做過「微調」（微型調查）畀大家睇。
今年將會出現嘅兩次月蝕類型唔同，聽晚出現嘅係月全蝕，下半年8月17號會見到嘅係月偏食。華華睇番過去5年出現完月蝕後，跟住個交易日嘅恒指表現，搵到啲頭緒，原來月蝕對股市未必一定有壞影響，要視乎邊一種月蝕。
由03到07年呢5年，共發生過8次月蝕，當中月全蝕佔3次，嗰3日之後嘅恒指咁啱都係跌，至於另外4次嘅月偏蝕同半影月蝕都跟住升市，只係03年嗰次嘅半影月蝕出現跌市。之不過，呢個微型統計唔夠代表性，所以華華搵埋玄學大師李丞責，講吓究竟月蝕同港股點樣掛鈎。

8月17日　月偏蝕要小心

李師傅話，玄學上一般認為月蝕會令政治變動，從而影響經濟，影響範圍喺月蝕前後7日，力度有幾深要視乎個地區見唔見到月蝕。好似聽晚嘅月蝕，天文台話香港應該睇唔到，所以李師傅嘅結論係：雖然有啲危險性，但影響力唔大；由於月亮代表慈愛、保護，所以代表掌管財富同福利等行業，包括銀行及保險股，影響會較大。
佢仲提醒散戶，話農曆7月17號（即新曆8月17號）嘅月偏蝕影響先至大，到時奧運舉行緊，散戶要小心嘞。而下半年至09年初，南半球嘅地區如澳洲同非洲，因為睇唔到月蝕，只要係政治穩定嘅地區，經濟都會好，李師傅仲話已經買咗澳元㖭，大家收唔收到？
電郵：mailto:[email protected]

過去5年月蝕對恒指影響

28/08/07
月蝕情況：月全蝕　之後首個交易日表現：跌343點

04/03/07
月蝕情況：月全蝕　之後首個交易日表現：跌777點

08/09/06
月蝕情況：月偏蝕　之後首個交易日表現：升49點

15/03/06
月蝕情況：半影月蝕　之後首個交易日表現：升200點

17/10/05
月蝕情況：月偏蝕　之後首個交易日表現：升56點

24/04/05
月蝕情況：半影月蝕　之後首個交易日表現：升56點

05/05/04
月蝕情況：月全蝕　之後首個交易日表現：跌147點

09/11/03
月蝕情況：半影月蝕　之後首個交易日表現：跌58點