韓國男星李棟旭今日喺首爾舉行粉絲見面會，據早前有報道透露同劇《鬼怪》男星孔劉會擔任特別嘉賓，所以粉絲都相當期待。

喺見面會開始咗約個半鐘，孔劉終於登場，佢同李棟旭好似《鬼怪》劇情咁，喺黑暗中一齊慢慢行出舞台，再加上當時嘅配樂，令台下粉絲尖叫不已。不過孔劉就唔似劇中咁着住長褸現身，反而以藍色冷衫出場，不過一樣咁靚仔。孔劉似乎唔多習慣咁嘅出場方法，行到台前時有啲怕醜咁縮一縮膊頭。

據知李棟旭設計咗個「Talk Show」環節，孔劉就係呢個環節嘅第一個嘉賓，而兩人重演《鬼怪》咁登場後，李棟旭又重演返劇集發佈會當日拖住孔劉埋位就座，HeHe味十足！

孔劉呢part完結後，李棟旭就換上輕便裝束現身，仲上埋二樓近距離見粉絲，之後又大跳女團TWICE嘅《TT》，雖然佢好怕醜，但依然落力跳，明顯下過一番苦功，隨後更應粉絲要求掀起件衫騷肌，好養眼。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。