趙頌茹同廖碧兒今日喺尖沙咀The ONE出席美容活動，着咗一條露背裙嘅趙頌茹，似乎肥咗少少，佢笑笑口話：「夏天唔想食嘢，但帶兩個女食嘢，我要執佢哋手尾。」

趙頌茹表示帶兩個女去教會參加暑期畢業禮，之後會去公園玩下。咁囡囡有冇玩捉精靈？佢話：「冇裝，我唔贊成過早玩手機遊戲。」

另外，廖碧兒就話最近忙緊同羅嘉良拍攝網劇《無間道》，稍後都要去深圳拍外景，所以都冇時間拍拖。講到《無間道》，碧兒表示拍得好辛苦，佢話：「有啲景好熱，我又要著羽絨，因為現場收音，所以唔可以開風扇，現場好焗，我一見暈就行出去抖下。」

對於早前有指拍攝ViuTV《瑪嘉烈與大衛系列 綠豆》時，導演嫌碧兒中文差，又傳出同周家怡爭戲份，碧兒話：「當宣傳，之前我都回應過，我聽聞好似想拍續集。」