由韓國影帝宋康昊、劉海鎮及柳俊烈主演嘅韓國電影《逆權司機》大後日喺香港上映，當中唔少港人睇完都覺得好似六四事件，不過睇過《逆權司機》嘅題材加上「禁韓令」關係，大陸鐵定上映無望。

雖然冇得睇原版電影，但唔少大陸網民都喺微博轉載《逆權司機》嘅中文版預告，單睇預告唔少網民都已經話超級期待，但佢哋都打定輸數冇得睇，已經打算另覓方法去搵途徑睇電影。而唔少大陸網民都慨嘆電影所寫嘅民運題材，就算有電影公司肯開拍，但一定唔會通過廣電局嘅審批。

同時有網民更直認韓國拍咗一部中國人唔敢拍嘅電影，因為觸及嘅題材太敏感，有網民更大膽提及「六四」，感嘆佢哋連提都唔敢提。