吳宇森繼《太平輪》之後，又一部大製作遭遇滑鐵盧，今次搵埋陳嘉上監製、佢執導嘅《追捕》，有福山雅治、河智苑同張涵予主演，寰亞公司投資咗3億人民幣（約3.55億港元），但中港兩地同一日開畫，上咗10日截至今日下畫5點，香港收約260萬港元，內地收咗約1億（約1.18億港元），票房真係麻麻。

寰亞今年上咗幾部大片，除咗《追》片外，其餘上映嘅《蕩寇風雲》、《鮫珠傳》同《建軍大業》票房都唔係好好，只有《春嬌救志明》票房同口碑交到貨。其實最大問題係老闆林建岳做咗旅發局主席之後，又好專注從政，冇乜點理娛樂事業，交晒俾陳嘉上同陳慶嘉佢哋主理，但好明顯冇老闆親自主理反而仲失色咗，睇嚟林生都係要分番啲時間去打理下電影部份，就算佢唔介意蝕錢，但部部戲票房見紅都好冇面啦！

更多娛聞，喺晒《娛果》
http://fb.com/appledailyent