一般打工仔如果想坐私人飛機、揸跑車，或者經常換名牌手袋，但荷包唔爭氣，有乜解救？𠵱家只要畀些少租金，就可以過吓富豪癮。美國近年興起網上奢侈品租賃，位於西雅圖嘅BagBorroworSteal就提供呢類服務，客戶只需每星期或每月交租，就可周身珠寶、名牌；行政總裁史密斯話，呢門生意有雙位數嘅回報。
Horatiolegrand喺《MSN討論區》問網友：「你哋有冇租過名牌手袋？」
MPSPMom回應：「當然有啦！我有時出席隆重晚會，要帶個名貴手袋去充撐場面，但啲手袋郁吓都要成千蚊美元（約7800港元）一個，又唔係經常用，所以我決定畀幾百美元去租。男人有時都要租晚禮服啦！」

生意利錢過一成

不過，AliciaR1認為手袋買好過租，因為個手袋屬於自己。Madeit亦唔鍾意租手袋，主要係擔心會有好多細菌。Cristina78解釋：「一個人如果肯出成3000美元買手袋，就會好珍惜呢件物品；但如果只需畀100美元就可以租到，佢就會用得好粗魯，甚至會掟落廁所塊地上面，個手袋會變得殘舊。」
hateditanyway反駁：「租賃公司早已有對策，因為租出嘅手袋如果有損毀，客戶要賠償，所以啲租客會好小心咁用。」佢話呢門生意嘅構思幾好，仲打算自己開番間租賃公司。
波士頓顧問集團（BCG）副總裁席維斯坦（MichaelSilverstein）講，奢侈品租賃係增長緊嘅行業，大有可為。事實上，呢個行業風行歐洲，當地部份公司為改善形象，都不惜畀錢啲員工租用奢侈品。