當年今日
關於我們

股路縱橫:俊和可長持預期升幅75%

蘋果日報 2004/07/30 00:00


期指結算日,淡友再騷Quali,全日係咁㩒住砌,7月期指大跌191點,以低位12149結算,好友費盡心血,營造咗多日嘅「強勢」,不堪一擊。恒指一度大跌235點,8月期指更大跌269點,淡友每5分鐘期指計價時就㩒低個指數,有計劃、有預謀、予取予攜;揸咗期指同Call輪嘅散戶,就茫茫然,滿眼眼淚……又做咗大戶點心。
好在個別股票唔衰得晒。恒指跌137點,仍有178隻股票(不計認股證)上升,特別係國企,個勢又返番嚟,最靚係江西銅(358)同吉林化工(368),傳言滿天飛嘅中石化(386)逆市升兩個位。
美股連升兩日,跌穿250日線之後上得番去,好大機會轉勢。油價上升係股市嘅剋星,對沖基金一早已攞油價嚟操控股市,但油價呢兩日雖創出新高,但美股唔單止冇跌,重「拗腰」回升,唔排除對沖基金正在平緊倉。

彩虹站項目利潤豐
港股噚日大跌,大戶目標只係期指,任務完成後,大市走勢會明朗番,若美股止跌回升,港股就可打破悶局,第一步上番10日線(12254)同20日線(12204),下一阻力係6月中嘅高位12539,衝破後可展上升大浪。
美國8月會再加息,本港資金走得快,今次唔跟唔得。但港息偏低,即使今年加0.5至0.75厘,對經濟同樓市唔會有太大影響。樓價下半年料可穩中向好,地產股仍係中長線投資對象,大藍籌依然睇好長實(001)、新地(016)同新世界(017),至於中小型地產股則可選漢國(160)同俊和集團(711)。
俊和上周派成績表,04年度(3月年結)獲利7136萬元,大增11.7倍,每股盈利9.9仙,末期息2.65仙,全年派息3.9仙,往績PE9.2倍,息率4.2厘。現年度,俊和盈利會再大躍進,PE降至低單位數,好吸引。
俊和位於彩虹地鐵站上蓋住宅項目,預期第4季開售,保守估計可為集團帶來5億元盈利,分兩年入帳,另有10萬方呎的商場和停車場保留收租,可提供穩定的現金收益。05年度,估計盈利約3億元,每股盈利0.41元,以4倍PE計,股價已可見1.6元,預期升幅75%!下個年度,盈利會繼續有增長。
郭兆誠