地產代理去年大豐收，利記周年晚會，都由舊年嘅九龍灣展貿，移師去灣仔會展，好多發展商都有出席，好似永泰李簡鳳玲、嘉華呂耀華、九建羅汝榮、恒基林達民、恒隆司徒永康，最畀面嘅，首推長實，營業部多位經理級人馬，包括梁焯鏗、何雨盈、梁婉君等等都出席。
剛剛踏入○五年，各大發展商都例牌透露吓今年賣樓大計。其中以永泰最特別，李簡鳳玲話，今年會進軍內地，搵啲酒店服務式住宅項目收租，目標城市包括北京、上海同埋華南，即係廣州、深圳等地。李太話，內地有WTO，又有○八年奧運，會有好多專業人士租樓住。
另外，長實營業經理梁婉君就話，葵涌漾澄軒，因為建築工程問題，睇怕要延遲到第二季尾先推出。

尖沙嘴舖貴嚇人
尖沙嘴舖位當炒，鍾姓投資者，三個月前買入加拿芬道八至十二號E地下D、E舖，三千二百五十萬，剛剛轉售，勁賺三成半，逾千一萬。
買家都算心口掛個勇字，個舖一千呎，由時裝店以每月四萬七租用，回報率只有一厘鬆啲。代理美記話，買家睇好區內除咗有東鐵尖東站帶動，重有河內道四街重建，租值重有得升。
蘭西計吓數，若然個舖要有四厘合理回報，月租就要升到十四萬六，即係要升超過兩倍，若然一年半載內，真係有咁大升幅，相信附近租戶就最驚。