盧巧音(Candy)一連兩場嘅《RE:TURN演唱會》噚晚喺旺角麥花臣場館順利完成，全場爆滿之餘仲有林曉培同黃偉文現身捧場，老公蘇浩才(Sammy)就喺台下欣賞Candy演出。甫開場Candy以一襲純白連身長裙現身，接連唱出《沮喪》、《昏迷》及《自戀影院》，台下均報以熱烈掌聲。

其後Candy再換上一套銀灰色長裙向觀眾表示：「我今年43歲，由舊年開始跑步，我覺得係一個Check Point，對自己一個承諾，以前我會換好衫然後坐喺屋企睇電視，再換番衫沖涼瞓覺，o依家我應承咗自己要今晚跑10K，就一定要完成佢，希望大家都搵到自己人生嘅Check Point，愛多啲自己。」然後一口氣唱出《三角誌》、《落地開花》及《垃圾》。

演唱會第三部份，Candy再換上一套貼身花花長裙，向觀眾表示：「自己入行20年期間遇到過好多人，用唔同態度對其他人會得到唔同結果，我以前對人唔係好好，所以得到嘅都唔係太好，但我發覺呢啲係人生嘅功課，我要多謝所有愛我、憎我、講我壞話、講我好話嘅，全部都要多謝。」然後就唱出《深藍》及《哲學家》。

到快歌環節，Candy換上紅色斜膊裙唱出《吶喊》和《暖色》，然後再拿起結他自彈自唱《All Apologies》、《Million Reasons》兩首英文歌。唱到《喜歡戀愛》時，嘉賓鄭秀文(Sammi)現身合唱，觀眾報以熱烈掌聲，Sammi向觀眾講：「大家唔好奇怪點解我會嚟，因為我好貪玩，咩年齡層嘅聚會都有參與，所以我同Candy係認識咗好耐，年紀亦只係差少少。」

Sammi又話近來睇到Candy嘅訪問，知道佢同樣曾受抑鬱症困擾：「過去兩年你出現咗少少狀況，睇到你面對嘅過程令我好感觸，見到你o依家健健康康再企上舞台，大家要多多支持。」旁邊嘅Candy就話：「其實初初邀請Sammi時都覺得佢未必得閒，點知佢覆我話可以時，我真係開心到心跳加速。」Sammi再話：「點知原來我真係咁得閒，好多歌手都有請我做嘉賓，我真係唔介意做嘉賓王㗎。」

更多娛聞，喺晒《娛果》
http://fb.com/appledailyent