宮雪花今日起程去美國出席邁亞美電影節，此行係去領取中美電影文化特別貢獻獎。今早十點，花姨喺中環站會見傳媒，但見佢一個人推行李，原來囝囝冇同行，花姨笑言囝囝「唔會啋我」啦。

花姨自言曾推薦好多部電影及短片去美國參展，今次佢已經背好晒英文講詞：「到時show quali，中英文水平，顯示國際視野。」佢話到時有好多大陸電影導演出席，希望有機會拍宮廷鬥爭戲：「依家好興嗰啲宮鬥戲，我好鍾意拍呢啲戲，做慘角色，成日俾人蝦嘅妃子，皇后妒忌我，斬晒我啲手放入缸中，淨係凸個頭出嚟。」仲話有導演指佢眼大，樣唔夠慘情。咪住先，依家宮鬥劇俾習總禁播喎…

下個月花姐姐生日，佢話想搞生日派對，但唔肯講自己幾多歲：「總之係成年咗，唔係未成年少女，等我攞埋獎返嚟大搞，搞個成人禮。」花姨嘅思路，真係好難捉摸。