財爺唐英年向來嗜好多多，唔單止鍾意飲紅酒，兼且重係個標準馬迷，對馬匹血統更相當有研究，歷年養過嘅馬亦唔少。今年暑假，唐唐就用咗二百幾萬，購入隻新馬「心福」，噚日沙田馬場上演「樂聲盃賽馬日」，「心福」首次出賽跑四班千二米，唐唐就嚟個一拖二策略，之不過並唔係講投注喎，而係佢拖埋媽媽唐老太同埋老婆大人，一家三口齊齊入場打氣。
至於噚日最吸引財爺嘅，並非「心福」或者重頭戲樂聲盃，而係贊助商喺馬場內展出嘅健康產品「騎馬健體機」，財爺一時興起，居然騎上去玩咗一大輪，而佢太太則企響旁邊用攝錄機，全程拍低唐唐嘅「馬上英姿」；但究竟唐唐最終有冇買到部騎馬健體機就不得而知，但肯定嘅就係「心福」雖然輸咗，但財爺就度過咗一個愉快嘅賽馬日。


爆料熱線：29290000、27860099
報料傳真：26239278
報料電郵：[email protected]