榮升為陳國坤太太嘅黃伊汶，今日都有到旺角出席發佈會，撐好姊妹何嘉莉榮升時裝設計總監。人妻鄭希怡陀B四個月都來撐場。

問黃伊汶習慣大家嗌佢做陳太未？黃伊汶話:「街市有人叫我陳太，但都係未適應。其實我哋未正式註冊，遲啲喺香港補番儀式。」

講到呢度，黃伊汶忽然講番細個嗰陣……玩碟仙喎。佢話:「細個試過玩碟仙，問未來老公姓乜，印象中個姓氏好普通，我覺得係靈驗咗。」咁都得？

黃伊汶又力撐好友何嘉莉進軍設計行列，佢話:「佢係我好朋友，佢重新pickup，做埋設計師，好叻，希望佢成功。我哋成日傾偈，我好支持佢。」講講下話題講到聖誕，預咗出埠玩。但之前Yumiko話黃伊汶都「快喇」(有BB)，咁依家進展係點呢？黃伊汶話:「我哋成班朋友輪住生，佢都叫我快啲，到時出埠一齊玩，最快兩年後啦。」至於會否做YumikoBB契媽？佢就話未講到:「但我知佢想生一男一女。」