懷舊成癡的「火車頭」李成文，繼潮人蒲點火車頭越南餐室、喜喜冰室兩大經典靚場、靚食，又轉戰大牌檔feel燒味街邊飯店，就在大坑火車頭對面開出「樂陶陶」，經典靚場、靚菜，原點還原，新阿飛正傳是日登場！ 記者：馮敏兒 攝影：陳陶鈞 Model：Michelle@Puremodels

大坑的回春飯店

當你路過樂陶陶飯店，就會被那無數暗示吸引，身在其中，更無時無刻不在提醒你「當年今日似曾相識」之慨，食飯同時是考古；無意拍到張懷舊相，竟發現有回春奇效，仿似回到熱情的六七十年代！問李成文，原來這兒原也是老街坊燒味飯店，一對年老夫婦辛苦經營，後來兩老中了六合彩，才讓予李成文大發其思古幽情也！

過主皇牌炸子雞

李老闆眾裏尋找大師傅，那人卻原來早在這裏，兩朝大廚老師傅的拿手炸子雞，坊間大部份虛有其表，脆皮容易，但肉無味，須要點鹽，但大廚的炸子雞不但「入肉」，且限量供應，你想佢脆皮「過氣」好難矣！

平凡原不平凡

菜式看似尋常，卻妙在還原基本步，簡單如菠蘿咕嚕肉，他用鮮菠蘿，還要先放最少兩日等熟，更只取最甜部份，而原材則用做叉燒的脢頭肉，味道便翻了天。還有他們的豉椒醬也是一絕，以$20両的果皮炮製，用來蒸魚、炒花蛤又贏你一條街。

燒豬燒鵝的時間觀念

燒臘最在乎時間觀念，例如風乾的程序，坊間一般只做一次「吹皮」，但正宗做法最少要「吹皮」三次，每次都用傳統牛角扇勁吹3小時，經此一役，最後才能燒出薄如紙的化口脆皮，選鵝則取最夠肉又不太肥的6斤半重。與燒腩仔同理，出爐超過3小時，本來鬆脆的化皮就會急轉直下，所以不但每日限量供應，食神都要拿緊時機，潮蓮燒鵝及燒腩仔日出三輪，中午11時，晚上6時半及9時。

超值老火湯　倒貼紅豆沙

是日例湯「昆布海草生熟地煲山斑魚唐排」大字鏡上，因為太足料，太夠火候，所以根本賺不了錢，那心機叫「倒貼」；但一碗以「塘西十二少」命名的紅豆沙開價$88，則嚇壞窮記者，雖然那是最少用6小時把紅豆煮出沙，蓮子分煮配貴價陳皮，最後成品的紅豆有沙狀有實體……原來只是老闆玩嘢﹕「如果客人欣賞，就無條件送畀客人！」為求「服眾」不擇手段！哈！

阿太的私竇「廚房」

後街還有一個「暗格」，對街大門十足古董電梯，但背後其實別有洞天，內藏雪櫃、蒸焗爐、酒櫃，還有大電視，一個廚房重地同時是私房廚房，客人大可親自下廚「演嘢」！

樂陶陶飯店