當年今日

  戴相龍一番話金融才俊心郁郁 - 李八方

蘋果日報 2002/02/24 00:00


中國人民銀行行長戴相龍日前在香港總商會晚宴上,又再呼籲香港金融人才北上搵工,重話可以做到分行行長甚至總行高層,在座好多銀行家都有啲心郁。
心郁不如身郁,聯交所前行政總裁徐耀華早已北上做深圳交易所理事,當晚都有去聽戴行長講話。
佢話上任無幾耐,唔想講公事,但係私事就可以八畀八方聽,佢話家陣香港、深圳、北京三邊走,佢重爆咗個秘密,原來佢同香港證監會前副主席米高吳偉驄喺北京「同居」。
「我同米高好熟,佢主要喺上海,成日要去北京,我主要喺深圳,又係成日去北京,所以夾份租咗個apartment,用嚟擺吓衫,休息吓。」
吳偉驄𠵱家係上海交易所顧問,同徐耀華都係港人北上出任金融高職的「四大天王」,另兩個天王係史美倫同梁定邦,同時任職香港證監會,一個做副,一個做正,不過佢哋就唔係咁friend,所以史美倫做咗中國證監會副主席之後,梁定邦連顧問都唔做,走咗去美國哈佛教書。
講開戴相龍,佢話人民幣愈來愈受歡迎,重話如果有一日喺美國可以用人民幣,佢會好自豪。
八方聽完佢講嘢之後,去咗灣仔北京水餃皇后消夜,鄰桌有一班北京遊客,佢哋問店主可唔可以用美金結帳,店主就問佢哋有冇人民幣,寧願收人民幣,呢一幕如果俾戴行長聽到,睇嚟佢都會幾自豪。
(圖)戴相龍叫金融才俊北上,重話可以做到高層。


E-mail:[email protected]