亞洲電視前夜正式落幕熄機,在尾段播放節目《MissAsia25th葡萄牙瑰麗巡迴》,節目未完突然終止,以亞姐羅霖嘅「獨立宣言」作結。
亞視前高層葉家寶今朝到白石角為慈善跑做開步禮嘉賓,佢慨歎亞視熄機冇畫上完美句號,熄機夜佢自己靜靜地喺家中度過,家寶話:「想自己靜下,唔想見證亞視結束,成晚瞓唔著,收到好多舊同事短訊我,點解結局咁核突、唔專業、冇水平,畫面突然冇咗,唔知佢地係咪想有神秘感待續呢?點解唔可以做得好啲,一定有時間銜接到最後一刻,要多謝59年來支持亞視觀眾同客戶,依家係無聲無色結束,好奇怪,好可惜。」
至於亞視終結時刻草率了事,一直有傳熄機前會有告別卡作最後道別,最終說好的告別卡冇咗,網上流傳亞視新聞主播喺社交網站形容,係因為通訊事務管理局辦公室認為告別卡內容太敏感,禁止播放。家寶覺得件事好無稽,佢話:「通訊局唔會預先審查你啲嘢,只會俾準則,營運者自己尊重,唔會事先檢查。」另一方面指高層何子慧硬銷一段個人推廣未來時段,耽誤時間,家寶話:「唔清楚,就算係都可以剪接調整,做剪接又唔使花錢。」家寶仲坦言最近冇留意亞視節目,只係關心員工點攞返錢。
亞視日前公布發展衛星電視,家寶話:「施生同中國文化傳媒係有講過呢啲發展,但到我離開亞視時都未有資金到位,可能依家有,呢啲要用錢,唔係講就做到,而且o依家解決員工資金為首,唔係講發展時候。」家寶現職協盛協豐控股集團執行董事,家寶對新崗位好滿意,仲話旗下有可能發展經理人公司及製作,到時前亞視人必定係首選,另今日家寶在場獲幾位粉絲舉牌集郵支持。