各大華資家族都講緊交棒，唔少三字頭嘅富二、三代已經當上家族上市公司主席，好似會德豐（020）主席吳宗權、華置（127）主席劉鳴煒，相對而言，恒隆地產（101）主席陳啟宗位大公子陳文博（Adriel）就真係低級，舊年升咗職都只係「高級經理」，佢𠵱家先至夠資格出差坐商務艙咋。
三十三歲嘅Adriel跟爸爸一樣，喺美國南加州大學畢業，修讀國際關係學學士課程，大約五年前返恒隆幫手，二○一二年開始跟董事總經理陳南祿，佢嘅職銜一直都係董事總經理「行政助理」。

陳文博升任高級經理

之但係，恒隆最新發佈一份有關社會服務嘅新聞稿，華華就發現Adriel嘅職銜竟然變為「高級經理」，即係話有人升咗職喇，唔通佢唔使再跟住陳南祿，好快就可以獨當一面？
消息人士就話華華諗多咗嘞，佢話Adriel舊年升職後，仍要幫陳南祿手，仲要睇埋其他生意範疇。
佢舉例話，Adriel之前去過歐美參考同類型公司嘅商業地產項目，了解海外同類企業𠵱家做緊乜東東，有乜嘢可以引入恒隆；Adriel又諗緊點樣利用科技去提高顧客喺商場嘅體驗。照咁睇，Adriel應該都係做緊啲大方向嘅嘢。
其實陳啟宗要求Adriel由低做起都唔出奇，陳啟宗只係六十四歲，仲咁精靈，有排都未交棒喇。佢舊年先話阿仔冇太多斤両，最好唔好放入公司董事局。
雖然未入董事局，但Adriel都算達標嘅。佢兩年前呻過，按以前職級，出差只可以坐經濟艙，佢希望五年內做出成績，夠資格坐商務，佢𠵱家升做高級經理，夠資格坐㗎喇。不過華華好奇，陳公子以前有冇自費升級呢？真係次次出差坐經濟艙咁捱得？

李華華
mailto:[email protected]