所謂好事成雙，田泰安及呂健威呢對騎練這晚（6日）谷草親身體驗，兩人去到最尾第八場二班1200米，聯手贏大熱門「一道」，各自起孖而回。「一道」跨季近三場全勝，今場單Win及組合獨贏A1分別派27及17元。

六歲馬「一道」與田泰安可謂擦出火花，連同今仗人馬合作累積五戰三冠兩季，其他騎師從未贏過此駒最叻跑位置，其馬主王志達仲巴閉，計埋名下星洲新星「大口仔」兩勝分級賽，個人今年內已五度贏馬，可謂旺氣迫人。

「一道」今場藉1檔之利，沿途守內欄第五位形勢有利，直路越騎越有小勝0.5馬位。此駒堪稱大器晚成，踏入目前六歲仍有進步，累積四戰谷草於1200米獲三冠一第六，路程實力可見一斑，今仗勝後估計將加至約96分水平。

「一道」騎練這晚甚旺，田泰安另外贏第四場霍利時馬房「喜菜」，呂健威第五場則由雷神勝出「獵狐者」，各自起孖而回。

尾場又係熱頭冷腳，二至四名分別為落飛馬「亞馬寶寶」、「鄉村輝煌」及「真先生」，四重彩派一萬四千蚊多啲。

今季首次谷草騎師王由田泰安勝出，佢同莫雷拉各獲兩冠一亞同得30分，雷神冇殿軍而田泰安有一席，因此終極封王。