韓國人氣電影系列《老千》，早前宣佈拍攝第三集《老千3》，並由柳承範、朴正民及金敏貞主演，預計明年上映。

《老千3》早前已開拍，不過噚日韓媒卻報道金敏貞拍攝咗幾場戲後，同製作組產生咗意見上嘅分歧，最終金敏貞被製作組飛起，製作組更極速邀請韓片《密探》女星崔有華頂替金敏貞嘅角色。據了解因為之前崔有華曾經進行試鏡，所以即馬上聯繫崔有華頂替金敏貞嘅角色。

而金敏貞方面回應傳媒時就話：「金敏貞確實退出《老千3》，但係並唔係有任何負面嘅原因，只係因爲同製作團隊有意見分歧，所以決定退出。」

另外，金敏貞被製作方飛走，引起網民熱烈討論，有傳因為金敏貞不肯拍裸露戲，網民指之前第二集《千術之神》，女主角申世京喺片中有性感場面，咁先能夠刺激銷情，所以第三集嘅女主角都應該會有裸露戲。網民認為製作方唔應該迫金敏貞拍裸露戲，但另方面亦應該事前要溝通好，咁就唔會發生咁嘅問題。

更多韓流，喺晒《娛果》
http://fb.com/appledailyent