當年今日
關於我們

求驗客手記:夜蒲玩殘隊友被逐出隊
馬爾干整「股」專家

蘋果日報 2014/09/10 05:20

求驗客手記

馬爾干因紀律問題俾巴西教練鄧加逐出國家隊,搞到踢唔到禮拜二喺美國對厄瓜多爾場友賽,聽聞話佢衰在夜蒲完遲咗返酒店,因而辣㷫鄧加。但江湖傳聞另有內情,話係佢貪玩搞隊友伊利亞斯文迪斯個pat pat,結果玩出火。
據巴西《奧萊報》報道,鄧加上周六畀球員放假1日,於是現年33歲嘅馬爾干就約埋伊利亞斯文迪斯同奧斯卡杜斯山度士落夜店。馬爾干一心諗住喺夜店食女,點知伊利亞斯文迪斯飲大兩杯就周圍搞事,仲衰到隨地屙尿,搞到佢鬼咁尷尬兼食白果。馬爾干為咗教訓伊利亞斯文迪斯,決定整蠱佢,不過奧斯卡杜斯山度士覺得太過份而冇參與,因而逃過一劫。至於呢個羅馬後衞點玩法?真係幾離譜㗎。
馬爾干用胡椒同煉奶倒落飲醉咗嘅伊利亞斯文迪斯個屁股度,第朝就同佢講話佢俾4個大漢搞咗。由於胡椒令伊利亞斯文迪斯有刺痛嘅感覺,加埋啲煉奶,佢就信以為真,仲話畀鄧加知兼報埋警。鄧加搞清楚件事之後,知道原來係馬爾干嘅惡作劇,但認為玩得太過份唔可以原諒,於是即時將佢踢出國家隊。
除咗胡椒加奶呢個版本之外,傳聞仲有兩個版本。其中一個話馬爾干真係搞咗伊利亞斯文迪斯個pat pat,不過若然係真,伊利亞斯文迪斯應該退咗隊,所以可信性極低。
另外一個版本就相當核突,話馬爾干將自己「某啲體液」倒落隊友大衛雷斯支洗頭水度。巴西足總始終冇就馬爾干被逐一事作出詳細回應,但效力禾夫斯堡嘅路爾斯古斯達禾就暗示:「呢個係內部決定,唔應該由我哋嚟講,不過我哋好應該引以為鑑。呢件事表明,我哋班球員必須適應新教練嘅風格。」
巴西新帥鄧加向來講紀律,連球員染髮都唔畀,就算馬爾干真係冇搞伊利亞斯文迪斯,淨係胡椒加奶同埋體液洗頭水呢兩單嘢,鄧加都足以判佢死罪。睇嚟鄧加一日仲喺度,馬爾干都唔使旨意可以返巴西國家隊。
識睇,一定係睇足英台【英波Live】:
http://soccer.appledaily.com
http://bit.ly/engballlive