當年今日

新車速報:
三菱AirtrekUrbanAir特別版 矚目度飆升

蘋果日報 2002/02/27 00:00


日本三菱車廠,一向予人善於RV車設計同包裝,而早前面世嘅新一代Airtrek,既有房車舒適性,又具備有四驅RV車嘅全天候操控力,廣受一眾用家追捧;有見及此,代理近期更引入多款UrbanAir嘅原廠配件,有興趣嘅Airtrek車主大可揀選合適嘅組合,替座駕粉飾一番㗎!

記者、攝影:陳偉林
度身訂做 誘發個性
原有Airtrek嘅房車化造型,經已教人有易於接受同耐看嘅感覺,較一般硬朗嘅RV車設計,更為容易受落;而新加入嘅UrbanAir套件,卻帶出Airtrek剛勁嘅一面,對喜好四驅車嘅朋友確實適合不過。

UrbanAir特別版升級有價
用料獨到 實用講究
以麖皮及人造雙色皮料配襯嘅車廂,較一般絲絨料更見高雅,而乘坐感覺既貼身又富承托力,完全烘托出Airtrek嘅個性來;然而,兩排座椅互相配合,可鋪排出闊大嘅卧牀,眺望雙天窗外嘅景觀,委實吸引。而後排向前放平,除令尾廂空間倍增外,地台下重有實用嘅雜物箱呢!
2.0公升偈 寧靜暢順
Airtrek用上一台2.0公升直4SOHC偈,雖然輸出唔算突出,但配合埋恒式四驅及4前速+/-半自動波箱,卻見有不錯嘅傳動反應及循迹力,難得引擎響每段運轉下,仍能保持有寧靜嘅暢順度,真係好有高級轎車嘅風範㗎!
記者試後簡評 優點 外形: 加有原廠UrbanAir配件,倍添有一分活力感。 車廂: Two-tone色調配襯時尚之餘,座椅空間亦見闊落。 設備: 頂級版既有雙天窗,又有原廠恒溫冷氣及音響,感受出眾。 操控: 2.0公升偈匹配恒式四驅系統,循迹性高及有全天候個性。 缺點 1. 一台2.0公升偈略嫌爆炸力不足,帶點柔弱。 2. 後排獨欠冷氣送風及房燈,稍嫌不足。