胡鴻鈞今日去商台宣傳新歌《偉業街》，佢話呢首歌俾佢好多回憶，當時亦係喺偉業街嘅studio寫歌：「我同阿道（蘇道哲）16年已經寫呢首歌，嗰時我25歲佢23歲，大家都仲係滿腔熱血，好想用首歌記錄嗰刻嘅passion，因為我哋都覺得若干年後，呢種儍勁就會冇咗。」至於點解隔咗兩年先派呢首歌？胡鴻鈞話依家係最好嘅時機，因為開始有少少經歷，唱出嚟嘅感覺又唔同。

提到佢最近憑《降魔的》嘅角色，角逐亞洲電視大獎最佳男配角，胡鴻鈞就笑言知道嗰陣，以為被整蠱：「初初我仲諗，邊有個咁嘅頒獎禮㗎，後來見到報道先知係真。今次可以同2位泰國演員同1位台灣演員一齊入圍，個感覺好唔真實，好似代表香港咁，如果有機會、大會又唔介意，我都好想去。」

問佢有冇信心攞埋獎？胡鴻鈞笑謂：「超額完成啦，真係冇諗過，有受寵若驚嘅感覺。」佢仲話嚟緊都有套新劇上，但就唔會有壓力，因為自己都係想以音樂為主。

精選娛聞，喺晒《娛果》
http://fb.com/appledailyent