【本報訊】近七千人昨日到紅館出席沈殿霞追思會，悼念這名香港開心果，肥肥前夫鄭少秋也在一片風雨聲中現身。豈料肥肥生前好友鄧光榮致悼辭時突然發難，怒轟鄭少秋未盡父親責任，更命令他上台解釋，令全場嘩然，氣氛尷尬。鄭少秋硬着頭皮偕女兒自爆家事，令原來肅穆的追思會驟變家事法庭，有理說不清。　記者：卓寶花　王連連　馮國康

無綫電視昨日假紅磡香港體育館舉行《肥姐　我們永遠懷念您》追思會，大批演藝界台前幕後人士均有出席，焦點人物鄭少秋前日從內地趕返港，送前妻最後一程。追思會一直氣氛哀傷，會眾不時揩淚。與肥肥以兄妹相稱的鄧光榮上台發言時，卻忽然情緒激動，公開責難鄭少秋多年來未盡父親責任。
「好多細叔伯喺台上或者台下，個個都睇住個女。不過我好奇怪一點，個女冇老竇㗎咩？」此話一出全場嘩然，鄧光榮卻越說越激動，憤怒地指着鄭少秋說：「點解到𠵱家先見鄭少秋出現？」

喝令「秋仔上嚟表白」

鄧光榮又以命令口脗請鄭少秋上台：「秋仔，你上嚟同大家表白吓，呢啲年嚟，你對阿肥付出嘅係乜嘢？對個女有冇付出過乜嘢？」
鄭少秋聞後苦笑，向鄰坐的欣宜望一望，然後兩人攜手步上台階。脫下帽子的鄭少秋說：「我一直都唔能夠好好照顧欣宜，係因為我同阿肥嘅婚姻失敗咗，阿肥又將欣宜送咗去加拿大，我亦都係為口奔馳，喺香港要不停工作，同埋走去內地同台灣，先能夠維持到我嘅生活。」他說，已盡量和欣宜保持聯絡：「欣宜係我個女，我當然係要盡量做好我應做嘅本份。」
談到未能到加拿大出席前妻喪禮，鄭少秋嘆氣數聲，望向欣宜說：「我只可以將真相講出嚟。」欣宜輕輕點頭示意，不過台下有人大叫「收聲啦」、「負心人」，謾罵聲此起彼落，場面混亂。一臉尷尬的鄭少秋問欣宜「我應該講定唔講好呀」，再獲女兒示意後解釋稱，去年聖誕新年前後，他一直有相約女兒用膳，安慰她和表示支持，「但係個女就話唔好啦，因為佢要陪媽咪，媽咪唔舒服，佢唔想嚟同我去食飯而放低媽咪喺度。」

台下鼓譟「藉口嚟嘅」

鄭少秋續說，他曾問女兒他可否探望肥肥，「但欣宜就話，佢（肥肥）每一次有朋友探佢時，佢都會夾硬支撐住精神去招呼啲朋友，過後反而就更辛苦。」他邊說邊望着欣宜，以求獲得她的支持，鄭少秋又說：「及後到佢又入醫院啦，欣宜畀我嘅訊息就話佢𠵱家喺ICU，最後等佢換咗私家病房嘅時間先至嚟探佢啦。係咪？但係一直都聯絡唔到。」
台下此時再度發出鼓譟聲音：「藉口嚟嘅呢啲！」鄭少秋只得向欣宜「求救」，欣宜心平氣和的說：「我覺得今日我哋辦呢個追思會係為咗紀念媽咪，我哋不如唔好俾咁多是非，或者各位有心人做出嚟嘅事情，影響到我哋懷念我媽咪嘅日子。」欣宜更為父親打圓場說：「爹哋，我都知道有好多人會誤會，做出啲假嘅嘢出嚟，我同我屋企人我哋都好理解，我哋自己知道真相就算啦。」
鄭少秋偕女兒落台後經過鄧光榮身邊時，他伸手欲輕拍鄧光榮以示安撫，可是鄧光榮一手撥開，示意他離開，鄭少秋一臉無奈。

沒交代缺席喪禮原因

其後鄧光榮和鄭少秋各自接受訪問，鄧光榮激動地說：「我覺得阿肥好辛苦，一個人帶住個女，個男人生個女出嚟又唔理。唔講喇！」另一邊廂的鄭少秋說：「我以後會好好睇住個女，等阿肥去得安心啲，我要返內地拍戲，不過同欣宜會一直保持聯絡。」他稱，沒有為鄧光榮的舉動生氣：「佢失去個妹，好傷心，加上之前啲新聞好影響人嘅思維，我可以理解。」
不過，鄭少秋一直沒有交代缺席前妻加國喪禮的原因，他昨日提到此事時似有隱衷，十分吞吐。其實，早於葬禮前，已有傳有人不欲鄭少秋在葬禮露面，其後鄭透過助手以手機短訊表示，缺席理由是欣宜不想他長途跋涉，加上出席葬禮的名額已滿，建議他不必出席。不過，肥肥生前好友陳淑芬表示，若鄭少秋要去加國，肥肥家人也不會阻止。

秋官面對鄧光榮責難經過

肥肥秋官恩怨情仇34年

74年
兩人往大馬拍戲，肥肥替好友森森向鄭少秋送分手信時，看到鄭少秋在廚房痛哭，肥肥由憐生愛

75年
情侶關係首次曝光，二人不久後共賦同居

84年
鄭少秋邂逅官晶華；同年肥肥找到兩人交往證據

85年1月
肥肥與鄭少秋在加拿大註冊結婚

87年5月
肥肥誕下欣宜

88年1月
肥肥向秋官提出離婚

89年8月
鄭少秋與官晶華結婚，其後誕下兩名女兒

07年10月
肥肥在瑪麗醫院接受膽管切除手術，這是秋官最後一次到醫院探望她

08年2月
病情惡化的肥肥再度入院，有傳在上海拍戲的秋官曾透過電話與肥肥道別；肥肥2月19日早上病逝

資料來源：《蘋果》資料室

今日你點睇?

如你對這則新聞有任何意見，請電郵至mailto:[email protected]