「獨樂樂不如眾樂樂」，睇波當然要一大班人才夠氣氛！數十位球迷出席《蘋果》會員獨家免費專享的睇波派對，見證般尼茅夫迎戰贏「紅魔鬼」曼聯。現場更有港超聯和富大埔教練「郭sir」郭嘉諾，以及香港五人足球代表「富仔」黃耀富一齊睇波，又玩遊戲大派禮物，實行與眾同樂。

郭sir身為多年曼迷，他對曼聯有信心，亦期待馬迪爾、拉舒福特及丹尼爾占士的前線三叉戟未來續有好表現。富仔就笑指普巴近期缺陣，曼聯都贏波而回：「佢繼續冇踢對曼聯嚟講都係一個好事！」自碧咸時代，已開始鍾情紅魔鬼的球迷Ryan亦有出席睇波派對，至於今季目標，他坦言愛隊聯賽衝擊前四難度高，但希望可以在一至兩個盃賽中奪冠而回。

「三軍未動，糧草先行」，睇波前球迷先享用美食。之後大玩估波膽及「的波」遊戲，爭奪T恤、頸巾，甚至曼聯主場球衣等豐富獎品，名副其實「有得玩、有得食」。不少球迷都大讚派對氣氛濃厚。在場不乏一家大細到場睇波，住在附近的李先生就帶同兒子Louis到場，更在搶答環節贏得頸巾。李生大讚一班人睇波的氣氛較好，笑言雖然自己並非曼聯球迷，但他希望兒子透過活動更認識足球。
記者：麥卓溢