中美股市膠着，港股順理成章繼續陰乾，早前魏力提過，目前港股要形成升勢極為困難，要A股美股同時有鑊氣先得，是但一邊唔得港股都跟跌，間中挾吓淡倉之後又再向下。另一方面，市場等緊人民幣入SDR及美國加息，暫時又唔會出手做低個市，冇大跌實在難以吸引大戶落手撈貨，兩個字：難搞！

板塊方面，比較突出仍然係科網、汽車及內房股，早前推介的科通芯城（400）、網龍（777）、和諧汽車（3836）及泰坦能源（2188），在弱市下仍能大漲小回，反映大戶不斷儲貨，有貨宜坐穩，毋須炒出炒入。自問眼光好又爛炒，亦宜一半坐貨，一半炒上落，否則一沽隻股就開車，換馬又易中伏，絕對得不償失。

悶市下揀股，現金牛絕對要秤先，汽車分銷股中升控股（881）為其中之一。交銀最新報告指出，今年中升現金、短期投資、已抵押銀行存款及在途現金合共將達72億元人民幣，折合達87億港元，已相當於目前市值，意味業務接近送畀你。今年預測市盈率9.1倍，市賬率僅0.5倍，為一眾上市汽車代理股中估值最低。走勢上目前企穩各主要平均線，MACD雙牛擴大，中線目標4.8元，失守3.7元止蝕。

掌握財經生活資訊，即Like「蘋果ATM」fb專頁啦！
http://fb.com/appledailyatm