話你知，「兵工廠」阿仙奴出產最多嘅並唔係「武器」，而係舞王。由安歷卡、亨利到家陣嘅艾廸巴約，個個為博加人工或者跳槽，總係fing頭扭腰扭屁股。艾廸巴約跳非洲舞跳得叻，而非洲舞好講究擺臀頻率、幅度，既然佢咁鍾意扭patpat，XX鬼呢個花名，我送嘅。
唔係講笑，我求大俠都學過非洲舞，當中有好多模仿耕作或者飛禽走獸動作的元素，跳得好，唔使幫襯變靚X都可跳出一身臀部靚線條。經過今個夏天，艾廸巴約屁股肯定靚絕，嗰頭扭完話想去AC米蘭，呢頭又扭話想投巴塞隆拿，仲話對方高薪挖角佢。佢補充一句，如果阿仙奴想留佢？「得，周薪加到12萬鎊就有得傾。」即係加薪3倍！

網民狂插　雲格唔撐

查實呢位多哥前鋒真係煩都爆，上季威過上半季咁大把，由長髮變短髮後死晒火；而之前話幫唔到阿仙奴贏聯賽冠軍就即刻收山，衰咗就唔見佢履行承諾。咁嘅人，仲點配同球會講價？
唔好淨係聽我求大俠講，不妨睇吓網民喺《世界新聞》報網頁嘅留言：「呢條友當自己係邊個？佢加盟阿仙奴前，喺摩納哥一季入6球咁大把，離開阿仙奴嘅話，怕且去到邊都只能夠入番咁多球。」「知唔知咩叫有約在身，唔知，使幾千銀搵個律師問問啦。」「貪心，好貪心，勁討厭！」
當然，都有網民撐佢，但領隊雲格肯定唔撐，睬佢都儍：「仲有咩好傾？佢同球會有約，嚟緊一季要為阿仙奴上陣，可以講嘅就係咁多。」又係嘅，雲格睇慣球員跳草裙舞，早排至睇完法米尼場科騷，跳跳吓跳去埋AC米蘭，最憎人咁做。艾廸巴約呢個XX鬼想跳得成呢場舞，唔易噃。