墨西哥上周發生地震後，有報道指皇家馬德里球星基斯坦奴朗拿度捐出100萬歐元（約920萬港元）賑災，但原來成件事係流料嚟嘅！

踢爆呢單流料嘅，原來係現時效力韋斯咸嘅墨西哥前鋒「小豆」查維亞靴南迪斯。點解會同小豆有關呢？原來有位Fox Sports嘅記者，話C朗今次捐款，係先聯絡曾經同佢一齊踢過皇馬嘅小豆，問過晒詳情再入錢落可信嘅機構。小豆知道後，就喺Twitter澄清，自己根本冇收過C朗電話，因此呢單新聞根本就係流料。

不過，之前報道過有位地震喪生小童嘅家人，寫公開信話囝囝係C朗球迷，就係真事嚟的，而C朗日前亦已經喺社交網絡上載相片，拎住件簽名波衫悼念呢位叫Santiago嘅小球迷。