江若琳噚晚喺九展開演唱會，李家鼎嘅紅顏知己都有到場、男朋友Oscar（蕭潤邦）當然都有到場支持，問到佢帶咗幾多生煎包去支持，佢就話每場都有帶一百個，第一晚嘅表演嘉賓有I Love You Boyz、Mr.、細So同埋杜汶澤。

一開騷嘅時候佢就自彈自唱，又同觀眾講，叫大家唔好當佢係江若琳，當佢係一個老朋友咁，希望可以帶啲回憶畀大家。講到呢度江若琳就換咗一件肚兜大露背，仲要前面開胸，有觀眾就喺台下大叫：「你好性感啊！」江若琳就回應話：「哥哥你真係識嘢。」

唱到《Show you》嘅時候，I Love You Boyz就出場幫手伴舞，兩個身上貼咗好多生煎包嘅貼紙，當奴就話：「有個人要看舖，所以叫我哋睇住你，你好性感，怕你冷親，但o依家我哋就流鼻血。」少爺占就話：「頭先喺後台，有個人一路睇住電視，一路講：『個衰豬搏到咁盡，你睇佢個側面，幾咁索。』真係吖，邊有人咁話自己女朋友。」江若琳仲好多謝I Love You Boyz一口就答應做嘉賓。

江若琳又講番自己嘅經歷，佢話：「有啲嘢未講過嘅，今日喺度同大家分享，幾年前同前公司有糾紛嘅時候，要去律師樓處理啲文件，但樓下有好多車好多狗仔隊，我就諗咗個辦法，就係叫貨車，之後再將自己塞入個好大嘅篋，再叫朋友抬個篋上車。經過晒啲追蹤車之後先出番嚟。」司機同江若琳講：「我以後都記得你，原來你出街咁辛苦，我o依家好似去棄屍咁。」江若琳亦喺個篋入面學識咩叫做「能屈能伸」，遇到難關嘅時候點都過到，可能會有好多個方法，從今以後你哋可以叫我篋神。

江若琳好朋友杜汶澤上台唱《叉燒包》，搞下笑又甩下beat ，江若琳就喺台下睇，杜汶澤最後就將歌詞「我最愛吃是叉燒包」改成生煎包。唱完歌，江若琳上台同杜汶澤吹水，江若琳話：「你媽咪我auntie喺台下影咗你好多相。」杜汶澤就話媽咪將江若琳當咗係新抱。

之後講到江若琳嘅官司，阿澤抽水話「嚟唱歌都好過借錢俾你打官司。」江若琳就多謝佢：「打官司時佢同我講『錢我就冇乜，但係一百萬都有嘅』。」仲讚對方有義氣，任何時候都會義不容辭咁幫手。

阿澤又喺台上講咗件趣事，有次兩人拍完戲轉景除咗戲服，江若琳唔記得着番件內衣，中途見到EO2 Eddie，幾個人一齊影相，江若琳搵咗阿澤遮擋，阿澤話呢件事後叫佢做「飛釘ling」。