【趕得到逗利是】錢國偉乖女出世重5磅幾 親手剪臍帶
Abby錢國偉陳宛蔚美人魚小姐
錢國偉12月拖住大肚老婆陳宛蔚睇中醫,佢日話原來BB已經出咗世。(攝影:葉君海)
錢國偉(Wilson)、陳嘉容、滕麗名今日到西九龍中心出席陳蕊蕊有份主辦嘅「第一屆亞洲美人魚小姐大賽發佈會」,負責擔任評判嘅Wilson去年底宣佈太太陳宛蔚陀B,今日接受訪問時就向傳媒公佈喜訊:「上個禮拜生咗喇,係女嚟嘅,重5磅幾。」Wlison話囡囡中文名要等師父改,英文名就已經改好叫做Abby,佢話:「其實平時都係阿B阿B咁叫佢,咪索性叫做Abby囉。」
問到初為人父嘅感覺,Wilson話:「其實都感動,之前都唔覺得有咩感覺?但係睇住佢出世真係有啲感動。」Wilson話自己識得抱B同換尿片,但講到湊BB辛苦,佢話:「始終係太太辛苦啲。」仲話當時有陪太太入產房兼剪臍帶,佢話:「都有啲手震,原本我仲諗自己咩場面未見過,但諗下諗下呢個場面真係未見過。」
Wilson透露唔少圈中朋友都會陸續祝賀佢,佢話:「鄭伊健雖然暫時喺北京拍緊戲,但佢話已經準備好BB嘅禮物。」問到會唔會計劃再追多個?佢話:「要搵多啲奶粉錢先,新年要抱佢出嚟逗吓利是幫補下先再諗。」
另外,有份主辦嘅陳蕊蕊受訪時就表示:「今日呢個選拔希望可以揀到十零個女仔,條件當然係要身材平均同埋識游水,仲要有海洋保育意識,因為勝出者要到世界各地宣傳,目前都已經收到唔少外國贊助商嘅邀請。」
最港電影大獎投票網址
http://bit.ly/thekongestfilmawards
精選娛聞,喺晒《娛果》
http://fb.com/appledailyent