張栢芝早排開咗IG，話咁快玩上癮嘅佢，幾乎日日喺IG拍片影相仲玩埋live直播。無論行街、坐車、作歌定滑水，鏡頭總不離身，所以話咁快就萬四個Fans Follow。

呢排多咗留喺香港嘅栢芝，日前公開佢同兩個囝囝、仲有個外籍型男嘅生活照，有指男方係栢芝為一對囝囝聘請嘅外語導師，但就融入栢芝家中。栢芝更搞笑留言： 「邊個咁衰偷影我哋。」

之後栢芝又貼咗大仔Lucas整理髮型嘅相，並打趣留言：「大個啦我就甩身，哈哈哈！」囝囝大個仔唔黐身，前兩日栢芝就專登去咗動物收養中心，收養咗一隻英短「小忌廉」同兩隻唐貓「叉燒」做伴，啱啱佢又貼咗短片，喺屋企後花園，同佢家中嘅八哥「婆婆」玩，仲話雖然屋企有咗新成員，但都唔會唔理「婆婆」。

當年啱啱失戀嘅栢芝講過：「我係個冇安全感嘅人，我覺得動物比人值得信任，你對佢哋好，一定有回報。」早年佢就試過喺1,800呎嘅康樂園屋企內，飼養咗15隻烏龜、兩隻貓、8隻狗同4條蜥蜴，簡直稱得上係迷你動物園。