袁國勇話平日返大學通常會帶住家飯,但佢好喜歡食椰絲奶油包,覺得好好味,直至早排消委會同食環署發表研究報告,先知道原來椰絲奶油包有咁高反式脂肪,當堂嚇咗一跳。佢話一個每日要攝取2,000卡路里嘅成年人,每日最多只可攝取2.2克反式脂肪,兩個椰絲奶油包已經超標,好彩自己平時只係間中食一個。
佢仲話以前細個時候,冇𠵱家咁多嘢食,一餐飯得幾條菜,有時會用豬油撈飯,豬油係蛋白質同脂肪主要來源,嗰時雞蛋只係肺癆病人先可以食嚟補身。但隨着社會越嚟越富裕,市民身體反而越嚟越差,所以佢𠵱家食嘢都盡量清淡,唔怪得之佢咁多年嚟都係咁瘦啦。