由韓劇《大力女子都奉順》嘅26歲男星朴炯植同《紳士的品格》嘅46歲型男張東健拍攝嘅KBS新劇《金裝律師》，噚日喺韓國播出第十集，港劇迷可於Viu同步追看。

承接上集劇情，張東健及朴炯植為12年前女大學生金敏珠被殺案件翻案，當年被指係兇手嘅張錫玄一案正式重審，但控方卻堅持張錫玄監禁及毆打金敏珠，更強迫對方吸食大麻，同時張東健、朴炯植亦接到一宗襲擊案，有錢仔朴俊奎撞傷路人肇事逃逸，雖然朴俊奎聽兩人勸告去自首，但受害人卻不幸身亡，令朴俊奎嘅罪名變為殺人罪。

張東健忙於處理張錫玄嘅重審案，所以就要朴炯植負責朴俊奎肇事逃逸一案，並叫朴炯植盡快庭外和解，但事件令朴炯植憶起當日父母身亡時，律師用錢打發佢嘅情況，所以其內心非常糾結，高聖熙就喺身邊安慰佢，除咗增進兩人感情外，更令朴炯植諗通唔再鑽牛角尖。朴炯植去到受害者家中做家訪，見到受害者家人負責纍纍，原本只希望獲得5千萬嘅賠償，朴炯植就建議被害者家人將賠償額5億用盡。

但喺呢個時候，朴炯植發現朴俊奎有服藥嘅習慣，佢為咗守護正義，向張東健提出上訴，但張東健就叫佢息事寧人，所以朴炯植私自將呢個消息話畀檢察官知，不過檢察官一心想入張東健嘅律師樓工作，所以檢察官就冇理會朴炯植，令佢大感灰心。另外，張東健為張錫玄翻案時，懷疑當年兩名證人韓勝泰及金振奎嘅口供，所以喺庭上提出比對兩人DNA嘅要求，卻被法官拒絕，張東健私下搵辦法證明，最終成功取得兩人嘅指紋，更發現喺證據上出現嘅血痕，與韓勝泰嘅DNA完全吻合，不過因為係不法證供，對案件亦起唔到作用。

最後，當年負責案件嘅朴刑警良心發現而幫助張東健，說服另一證人金振奎講出真相，最終金振奎供出韓勝泰嘅罪行，幫張錫玄洗脫罪名。另外，律師樓嘅咸代表因為家人逝世，即時回到韓國。

《金裝律師》噚晚一集收視微跌至9.6%，但仍然穩坐同時段收視冠軍，至於黃靜茵孖南宮珉主演嘅新劇《訓南正音》，噚晚播出嘅第3、4集就有4.9%、5.0%收視率，比前晚收視率跌咗，而MBC嘅《過來抱抱我》就播出第7、8集，分別有4.6%及5.4%收視率，有望超越黃靜茵新劇嘅收視。

更多韓流，喺晒《娛果》
http://fb.com/appledailyent