久未在港露面的海俊傑、文佩玲、莫鎮賢、可嵐、張崇基及張崇德等前晚在九展演出「梅艷芳──致敬我們香港女兒慈善音樂會」，海俊傑打頭陣唱出梅姐的《心債》和《感激》，新秀出身的他，慨嘆沒有和梅姐同台合唱的福份，不過他仍開心表示：「今次返到嚟可以講廣東話，見番啲前輩朋友，都有十年冇演出過。」

文佩玲技癢想開騷

現年44歲的海俊傑在內地發展多年，外表依然保養得宜，他透露快將成為人夫，與化妝師女友Effie共諧連理，他說：「我好快就結婚啦！3月1號喺墨爾本舉行婚禮，返嚟會補擺喜酒。」
至於86年參加第五屆新秀、現年52歲的文佩玲，當年擊敗許志安及黎明贏得冠軍，她退出樂壇多年，上年曾現身大台《靚聲王》節目。前晚她身穿黑色透視裙現身活動，接受訪問時坦言有興趣再踏舞台，她說：「我都想開演唱會，不過冇人聯絡我，已經好少同呢行嘅人聯絡，最近莫鎮賢話有呢個騷，叫我幫手唱，講真我係有啲技癢，鍾意唱歌，尤其鍾意唱live band，所以二話不說就答應，我同梅姐冇合作過，大家喺華星屬唔同年代。」
以壓軸嘉賓身份出場的莫鎮賢，一身黑色長褸打扮造型，在台上與舞蹈員勁歌熱舞，他唱了梅姐三首經歌曲，並特意佩戴早前在梅姐遺物拍賣投得的兩個襟針吊墜，認為會特別有力量，而現場以他的輩份最大，演出有壓力。
採訪：王連連
攝影：陳慧安