自從國家主席習近平上台高呼實現「中國夢」，振興中華民族後，各地大小官員都跟隊一齊圓夢。前海深港合作區成立5周年，由當年黃沙一片，到今日國際金融機構及大企業排隊進駐，又難怪前海金控董事長李強發表「前海夢」，不過今次圓夢嘅，仲有老外滙控。
噚日係滙豐前海證券公司正式開業，滙控與前海金控各佔51%及49%股權，李強形容經過多年奮鬥，滙控與前海終於譜出「一個最偉大愛情故事」！

合資開證券公司

合資公司係CEPA《補充協定十》嘅成果，李董喺台上話當年，當初要向中證監確認，滙豐係符合「港資銀行」資格，已大費周章，但有誠則靈，獅子行在發展最懊惱時仍堅持下去，前海金控亦一直風雨相隨，今日大家「前海夢」功成，「如果這是一個愛情故事，那就是一個最偉大愛情故事」。嘭嘭！
雖然李強比喻難免有肉麻之處，但亦有事實根據。開幕儀式前，專程踏足前海主禮嘅滙控行政總裁歐智華同華華講，自己第一次與內地洽談參股證券公司，已經係15年前往事，之後兜兜轉轉，終於等到家陣滙豐前海證券出現。
歐總、滙豐亞太副主席兼行政總裁王冬勝，及滙豐大中華一姐黃碧娟，昨聯袂中方夥伴及內地官員，齊齊主持剪綵同醒獅儀式。

李華華
mailto:[email protected]