噚日朝早10點左右，馬鞍山路近大水坑，有一架載住垃圾嘅吊臂車行行吓突然起火，九巴車長石先生當時揸緊空載巴士返馬鞍山站頭準備食飯，佢離遠已經見到黑煙，估計前面有火警於是慢駛，到附近嘅時候俾警察截停佢，徵用巴士上面嘅滅火筒救火。

車長讚機警

石先生話當時截停佢嘅交通警手上已經揸住一個滅火筒，警察指住個滅火筒，佢知道係想問佢借巴士上嘅滅火筒，於是停車，即刻用鎚仔扑爆玻璃攞個滅火筒畀警察用。冇幾耐另一架都係空載嘅九巴87D亦都經過現場，車長見到咁嘅情況，都將巴士上嘅滅火筒畀警察用。

車長讚嗰位交通警反應快、夠機警，不過始終太大火，要消防員救熄。吊臂車35歲姓甘司機冇受傷，消防初步調查相信火警冇可疑，事後吊臂車清理番路面燒過嘅垃圾。九巴發言人話公司好樂意配合警方嘅行動，滅火筒喺有需要嘅時候就可以攞嚟用。事後兩架巴士已經駛返車廠，重新安裝滅火筒同埋扑爛咗嘅玻璃。