蘇保羅馬房向來予人慢熱感覺，季初成績不太理想，但近兩季情況有些微改變，9、10月皆有頭馬交出，而最不一樣係以往季初旗下馬不熱衷參與試閘，靠實戰熱身，但今季則不一樣。

剛周日（10日）開齋馬「一帆風順」就是最佳例子，周三（13日）晚三匹上陣馬賽前均試完大閘才報名，是否取得預期效果當然要跑完才知，但起碼有得博。

尤其係有王牌在身的尾場「嘉應之友」，上季轉投蘇保羅後季初跑田草屢吃悶棍，直至轉場向谷草、泥地發展才取得上名，但可惜都與頭馬無緣，今季7月24日機坪重開已急不及待復課，與「一帆風順」一式一樣，明顯心急交代。

本來另一王牌馬「光芒再現」亦好，回落至72分低位有着數，但排位後抽12檔兼潘頓試完閘唔揀有戒心。

反而頭場「越跑越好」六歲唔會再有大進步，趁季初對手狀態未足下，確係爭取頭馬好機會。