當年今日
關於我們

同狗教授上堂 逼住講英文

蘋果日報 2007/11/19 00:00


上堂學啲乜?

一聽到狗仔同小四、小五學生一齊上英文堂,第一個念頭就係︰世上最難控制嘅兩樣嘢──動物同細路,擺埋一齊會唔會好混亂呢?去到馬鞍山靈糧小學巡一巡,見到最後一課畢業課堂秩序良好,同學仔圍成一圈圈,聽住nativespeaker以全英文上課,好專心喎。其實呢啲小狗大都係身兼狗醫生身份,訓練有素當然幫得手。究竟狗和細路一齊上堂會做啲乜呢?

齊做工作紙

當各位小朋友乖乖上堂做worksheet時,狗教授會趴地陪伴。

交際應酬

Equal咁得意可愛,小朋友見到免不了都要摸兩下頭稱讚兩聲。

堂上開餐

堂上會教小朋友餵飼狗仔,想餵就要排好隊,有禮貌地用英文問准狗主"MayIfeedthedog?"

學梳毛

要對小狗負責任,就要照顧得佢夠周到,學吓點幫狗仔梳毛係基本功。

拖住散步

小朋友可以拖狗散步,只要先問狗主"MayIwalkthedog?",便可帶狗漫步。

承諾

同學要宣讀一段英文誓言,記得自己講過"IpromiseIwillbuildabetterworldforanimals."

Graduation

畢業課堂後戴上畢業cap帽,為期4堂的ProfessorPaws課程就完結。

靠估價灌輸責任

亞洲動物基金公關Edwina話,小朋友總係有種好想親近動物嘅本能,所以佢哋將小狗、學英文和對動物嘅責任,放入ProfessorPaws嘅課程內,學習才夠生動有趣。例如worksheet的內容有些是教養狗的財務責任,佢哋會先叫小朋友估狗糧狗玩具等價錢,從中令佢哋知道養狗的開支。

學生有Say

在課堂上,小朋友在worksheet上填的生字,也不過是"Big"、"Love"、"Think"咁簡單,但因有狗教授陪住讀書,加上每次餵狗散步都要先說英文問准,從而令小朋友對學英文不再抗拒。
小四生Zoe:初初只識講生字,但因每堂都會問可唔可以餵狗,講得多就成句講都冇問題。

媽媽劉太:佢𠵱家會上網搵動物嘅資料睇,連對英文都想學好啲,又會同讀中學嘅家姐講英文,出乎我意料之外。

對狗要有耐性

小四生Bobo:我學識咗點訓練狗仔,原來教佢一啲簡單指令都要好有耐性。

成句誓詞都曉讀

小四生Akina:我初時都只係講單字如"Sit"、"Hand",但最後一堂已識讀英文誓詞喇。
小四生Dennis:我學會狗仔不同身體部位的名稱,仲有我學識原來狗同我都一樣可以做醫生。

媽媽Cindy:我無諗過佢除咗學識點愛護小動物之餘,仲想開始補習學好啲英文。

ProfessorPaws3歲大了

3年來亞洲動物基金旗下的ProfessorPaws已服務超過4,000名小學生,今年擴大規模,成為「英語節2007」活動之一。ProfessorPaws跟小學合作,用小班教學形式,以8至10個小朋友圍成一組,找來狗教授和外籍老師授英語課。每次ProfessorPaws都會出動約8位狗主加義工一齊上課,由於冇枱冇椅,令小朋友學得更自由。