由荷李活諧星積比力克（Jack Black）、「The Rock」狄維莊遜（Dwayne Johnson）嘉倫招莉仁（Karen Gillian）及奇雲哈特（Kevin Hart）主演嘅《逃出魔幻紀：叢林挑機》（Jumanji: Welcome to the Jungle）將於本月21日上映，呢部戲係向已故笑匠羅賓威廉斯（Robin Williams）22年前主演嘅經典喜劇《逃出魔幻紀》（Jumanji）致敬作，因此都秉承其搞笑兼冒險嘅精神。早前《蘋果》更特意遠赴巴塞隆拿，獨家專訪主角積比力克及飾演神秘角色嘅Nick Jonas，兩位主角更大爆自己嘅瘀事！

今次電影以打機為主，而積比力克真人果然都好貪玩，一講打機就停唔到口：「我好鍾意打機，但已經冇以前玩咁多，我以前成日都玩，但大個後就愈嚟愈忙，已冇時間。不過我於電話仍玩好多，會玩電子桌上遊戲，例如Risk，又會玩串字遊戲如Scrabble。」不過佢就大呻自己兩個寶貝仔唔肯同佢一齊打機！「但我啲仔唔想同我玩遊戲！我話：我想玩，我嘗試學，而家可以玩Mindcraft喇！但佢哋話：我們已唔再鍾意Mindcraft喇，玩到悶。如果我覺得一件事有趣，佢哋就會話：而家已經唔有趣喇。」

積比力克今次要扮少女口吻講嘢，佢就笑言天生已經識，全無難度，又講到今次入森林係對前作嘅一個補完：「我哋嘅版本有咩好呢？原裝版本羅賓威廉斯跌入遊戲之中，於森林被困20年，但你作為觀眾冇見過個森林，亦唔知佢身處嘅地方係點，因為嗰陣特效未咁好，要做就要好多錢，但我哋有錢又有特效，所以我哋可以入去森林，所以呢套戲叫《逃出魔幻紀：叢林挑機》，成套戲都位於難以置信、恐怖嘅魔幻森林入面。」

另外一位神秘角色Nick Jonas嘅身分充滿神秘咁，佢就話自己係冒險隊嘅一員，而自己細細個都已經好鍾意呢部作品：「我係《逃出魔幻紀》嘅粉絲，第一次睇係4、5歲左右，租一盒錄影帶，同爸爸睇幾次，真係一部好好嘅電影，好多人鍾意，我覺得係羅賓威廉斯其中一部做得最好嘅作品。」另外佢又大讚幾位拍檔又好人又搞笑，尤其是諧星奇雲哈特，更會成日整蠱佢：「好高慶可以加入呢個組合，最好笑就係你一直都驚會出現於Kevin嘅Instagram、snapchat之中而你唔知，佢好叻偷拍你0218一直以嚟都好多笑聲，好開心。」