楊千嬅下個星期二做拉闊音樂會，噚晚喺土瓜灣綵排，佢話今次有別於以往嘅拉闊，係一個音樂劇形式。當中有不同單元故事，包括愛情故事、職場女性辛酸、男人孤單，其中一個係同陳柏宇嘅故事，千嬅話﹕「嗰個係講夢入面嘅事，佢同另一位演員飾演一對落難嘅王子公主，我就唱個故事出嚟。（今次同新一代歌手合作，感覺點？)好玩、好開心，因為有時佢哋睇到嘅角度同我唔一樣，同埋我有啲歌就變古董，有隻歌佢哋問我係幾時，我唔好意思講，其實已經17年前，淨係話『幾耐』。」

千嬅最近除咗綵排拉濶，又要預備紅館騷，又要做家庭主婦同錄唱片，所以好忙，同時籌備兩個騷，會唔會試過撈亂啲歌？佢話：「其實我試過撈亂嚟啦，上次C AllStar演唱會撈亂嚟，唱唱吓我突然飄走咗，因為我係記緊呢個騷嘅《最後的歌》，我望住佢哋仲諗做乜甩嘅，但聽聽吓唔對路，所以佢哋四個好勁，幫我唱埋。」講番，千嬅喺C AllStar演唱會話可能出年退休，千嬅話：「其實退休係一種狀態嚟嘛，我未試過，同埋好多人退咗休都搵番工嘛，所以呢啲係好casual嘅事，唔好睇到咁嚴重。」

更多娛聞，喺晒《娛果》
http://fb.com/appledailyent