【咬實牙關生活】河國榮停工半年經濟陷困境：我相信仲有排搞
蘋果日報 2020/06/12 17:30
河國榮
（FB圖片）
河國榮在1987年隻身離開澳洲來港發展，從此熱愛這片土地，一做便做了33年，雖然當日河國榮讀醫科只差一年便畢業，但他為了追求自己的夢想，不惜放棄學業。不過人生總有不如意的事，在河國榮的演藝事業上，曾遇上一次又一次的難題，在2017年年初曾經患上基底細胞癌的河國榮，原來在同年年底因為心律不正而先後做了2次手術，直到今年年初，他收養多年的14歲毛孩QQ又證實患上骨癌，最重要的是，因為武漢肺炎的關係，他已經停工半年，為了支出自己和QQ的醫藥費，他接受周刊訪問坦承欠下朋友和卡數逾80萬，目前更需要申請政府的抗疫基金解燃眉之急。河國榮在訪問上表示目前復工無期，惟有盡量減省日常開支，有段日子精神受困擾，情緒變得低落，幸好在最困難的時候，得到一個圈外朋友幫助，為了生計，河國榮表示不會再等，他計劃開設YouTube頻道，嘗試創另一片天。
今日《蘋果》致電河國榮，談到目前的情況，他說：「全部都係等，好多嘢都停咗，我相信仲有排搞，好多嘢變得好快，但係冇得唔樂觀，做到幾多得幾多。」他還說：「社會有幾10年購物文化，經濟健康嘅時候，梗係冇問題，但係一出現挫折，經濟咪會崩潰，而家好多人都唔出街消費，經濟又點會好？疫病又未消滅，聚埋一齊好易爆發，下一波疫情爆發，情況會好嚴重。」正因為這原因，河國榮經常與人保持距離：「基本上唔出街，最多係間唔中去茶餐廳外賣買西多，又或者抱QQ去士多飲奶茶。」
後來，又問到他的YouTube頻道的籌備情況，他說：「概念係有，但係未有行動，一方面係因為我係完美主義者，想做到最有效果，另一方面始終要搵多啲人幫手，內容係講音樂，但係近幾個月情緒低落，瞓得唔好兼冇練聲，所以唱得唔好。」再問今次是否人生最低點？他説：「唔係，應該以前都試過，我成日提醒自己，始終有一日會見番光。」他還說：「好彩之前開咗個音樂會，叫做還咗自己一個心願，如果唔係睇而家情況，都唔知有冇機會實現，我仲好想返澳洲見下父母，我爸爸係一個超人，柏金遜咁嚴重，仲可以堅持，今日佢仲自己整緊雞棚，佢係唔放棄。」
河國榮讚太太是一個強人。（資料圖片）
唱歌一直是河國榮的興趣。（資料圖片）
河國榮在2017年患上皮膚癌，幸好不算太嚴重。（資料圖片）
受疫情影響，河國榮停工一段時間。（資料圖片）