周二晚看見列基美射失12碼，差點哭了出來。
雖然小編是阿仙奴球迷，但呢球波，抵輸。家中3兄弟都有「阿根廷基因」，1978年，幾歲大，看決賽阿根廷贏荷蘭，金巴斯入波，全場白絮滿飛天，至今仍歷歷在目。然後馬勒當拿、肯尼基亞出現，又然後有巴迪斯圖達。英格蘭球星都自以為係時裝界，巴西球員都是腳踢版哈林籃球隊，而阿根廷球員都是性格演員，有人味，特別是列基美，帶點孤僻，不喜接觸傳媒，顧家（是家中十兄弟的老大）、重情義（早年河床高薪挖角，唔去！）。好波但命運坎坷，早兩年被巴塞棄用，打的維拉利爾其實只是小球會，個球場得2萬幾個位，論規模喺西班牙簡直係旺角場，但與科蘭兩個失意人，關過關打到入歐聯。

這是個小丑的年代。做人要浮誇、要包裝，無料者開工固然要大大聲，惹人注意，好波如細哨都要用特技拍廣告！大氣候是講錢（賣到Product）、講潮（食個麵都要「潮人配潮麵」）。好波又平實、低調如列基美，係絕種男人。不過呢期，各行業默默耕耘者似乎都無運行。
這一晚他令我想起NickDrake，一個在生時「經典唱片」都賣不好的歌手，都帶點我行我素。如今惟有望，阿仙奴517食「塞」話咁易、阿根廷拆「巴」成功！（賭波版語，係咪「潮」先？）