很多時叫「Rocky」的都是大隻佬。

沒錯，05年香港先生「健力組」冠軍鄭健樂也叫Rocky，他是爆肌猛男，當選後加入娛樂圈，簽約成為無綫旗下藝員，2010年10月解約離開，2012年重返無綫，現年52歲的Rocky兼顧幕前之餘，一直做私人健身教練。

年過半百的Rocky依然操得好fit，跟無綫雖仍有藝人合約，但做藝人沒有保障，Rocky想通了決定工作重心還是放在私人健身教練上，決定密密接客養家。已婚的Rocky跟圈外太太育有兩名兒子，分別11歲和10歲，一家之主的他擔子不輕，若然不切實際追夢，也不會是一個負責任的丈夫及爸爸。

Rocky日前在銅鑼灣接受《蘋果》專訪，親身示範幾招，包括最流行的TRX和戰鬥繩，他馬上汗流浹背。Rocky大談新動向：「最近做番老本行私人健身教練，其實我不嬲加入TVB都有教，可能拍嘢忙，教少啲，而家full time去教，始終我興趣係教健身，我有超過30年教健身經驗，一路冇擺低過。拍劇通告時間唔穩定，好多時要等好長時間，又有時over run，有時連續7日，兩星期、四星期開工都有，預知唔到，通告比較亂，難全職教健身。」Rocky分派都是閒角，騷錢自然不多，不過他明知藝人不賺錢都留低，為的想維持知名度：「做藝人搵幾多睇自己level，有人可能搵好多錢，有人搵一般或搵少啲，我就唔穩定，如果劇接劇比較好啲，電視台計騷，我試過最差嗰個月收入得4位數。」幾千元養妻活兒確實有難度，Rocky續說：「要太太幫忙支持，公一份，婆一份，自己仲要就住使，甚至動用積蓄，兩個小朋友返學都要用錢，一定唔會好似冇小朋友嗰時咁鬆動，而家我乜都諗兩個仔先。」

Rocky表示每月彈性給太太家用，「拎得幾多得幾多，我最窮時銀包得幾百蚊，好彩而家有信用卡同八達通，可以先使未來錢。」太太可曾投訴叫Rocky不要再追夢？Rocky答：「佢明白嘅，呻一、兩句梗係有，呢啲人之常情，我當然唔好意思，對屋企人係有少少內疚，希望好日子同好運快啲嚟，多工開好番啲，我平日會積穀防飢，儲定錢畀兩個仔，好天搵埋落雨使，娛樂圈你唔知自己工作量，可能好忙，亦可能好靜，呢行係咁。」

入行14年的Rocky，說實話沒有代表作，無綫近日深宵重播Rocky有份參演的劇集《烈火雄心3》，他扮演消防員。Rocky演過的角色，觀眾只記得他常常要爆seed，大聲嚷着「我好嬲呀」，但心底裏都想好期望突破：「公司安排我做嚟做去都係做健身教練或大隻佬角色，以前唔覺，後來就千篇一律，講句俗啲，自己唔厭觀眾都睇厭，觀眾對我係冇期望，我其實都想試吓其他角色，試吓其他發揮，等觀眾知我係可以。」那麼恨演甚麼角色？Rocky衝口而出：「應同自己身形好相反，例如做CEO、經理嗰啲專業人士，而家年代，好多CEO都玩gym，我覺得我身形去演都make sense。」

Rocky對演藝有憧憬，他期待一個機會的來臨，「而家模式轉咗，我會放多啲時間做私人教練，但仍希望會等到一個啱自己嘅角色、有得發揮嘅機會，真係唔知等到幾時？可能呢世都等唔到，可能聽日就嚟，冇人知，自己做好呢刻先。」現全職做私人教練的Rocky，學生數量及工時可以自己安排，收入除比做藝人穩定，也可安排時間享家庭樂。Rocky不放棄演藝夢，他決定每一步都必定家庭行先，「我當然會將一切希望擺喺兩個小朋友身上，希望可以做到『100分好爹哋』，我要教多幾個學生，教多幾堂追番條數先。」

有指Rocky在劇集中，經常做似嬲非嬲的表情，Rocky解釋因應角色而演：「我每次都跟劇本去演，每個人都有情緒，冇人唔識嬲，我都有脾氣。」Rocky更當着鏡頭即場示範非常憤怒表情，EQ很高的他難忘一次「跳掣」：「曾經有一件事，我睇到家中工人打我細仔，我嗰刻真係好嬲，咁我又冇理由出手打番佢，只有炒佢魷魚，真係好嬲囉！」

52歲Rocky有意年尾參加健美比賽，他打算利用這幾個月時間操練，他謂即使年過半百都可以做gym：「做運動唔分男性、女性，唔關年紀事，年紀大同年紀輕有唔同訓練方法，當然越後生做就越着數，即係越早起步，等於儲錢咁，唔會老咗先去儲錢，每日操個多小時，自然日子有功。」Rocky指長子有跟他在家舉啞鈴，他卻建議未發育的小朋友健身時要適可而止：「少年只能適量健身，可以做吓深蹲等動作，做過量會妨礙發育，始終佢哋啲骨好軟，最好16歲以上先健身。」

採訪：比華利
攝影：陳慧安
攝錄：廖達燊
場地：Sci-Fit健身中心

-----------------------------
【撐學生】
召集有心人 撐學生全年睇《蘋果》
立即按此

-----------------------------
《囚牢之疆》 專頁
揭開集中營邪惡面紗
今日新疆 明日香港