民主之父馬丁唔選，自言其中一個原因係囝囝李祖詒叫佢退休，有啲馬丁fans指祖詒咁自私，令香港民主陣營「真空」，祖詒噚日接受港台節目訪問大聲呼寃，強調馬丁冇可能因為佢講幾句話就唔選。
佢憶述兩星期前一個晚上，放工返到屋企已凌晨1點鐘，兩父子促膝詳談，佢同馬丁分析再選同唔選嘅好壞，但坦言認為老竇應該退下火線，畀新人上場。兩人傾到凌晨3點，馬丁係咪真係聽得入耳，當時唔知。
本身都係大律師嘅祖詒話，自細已直呼老竇個名Martin，因為親切自然啲，佢又大爆馬丁私隱，話馬丁衣櫃內，一條牛仔褲都冇，波鞋就有幾對，多數係舊款Nike。祖詒暫時無意從政，將來係點，總之neversaynever。